Unicorn គឺជាពាក្យក្នុងពិភពជំនួញ ដែលគេសំដៅទៅលើក្រុមហ៊ុន startup ឯកជនដែលមានតម្លៃលើសពី ១ ពាន់លានដុល្លារ។ ថ្ងៃនេះដែរ LuyBook ចង់មកចែករំលែកពីបណ្តុំ unicorn ដែលកំពុងតែរីកលូតលាស់យ៉ាងរហ័សនៅក្នុងតំបន់អាស៊ានយើងផ្ទាល់តែម្តង។

 

អាស៊ាន គឺជាទីផ្សារវិនិយោគមួយដែលមានភាពទាក់ទាញខ្ពស់សម្រាប់វិនិយោគិន និងអ្នកជំនួញ ដោយមូលហេតុប្រជាជនមានអាយុក្មេង (មេដ្យានអាយុ ២៨,៩ ឆ្នាំ), ទំហំទីផ្សារធំ (សរុបប្រជាជនលើសពី ៦០០លាននាក់) និង រួមជាមួយបរិយាកាសឌីជីថលដ៏អំណោយផល ដែលបានបង្កើតនូវប្រព័ន្ធអេកូឡូស៊ីយ៉ាងរស់រវើកនៅក្នុងតំបន់ សម្រាប់ការបង្កើតជំនួញថ្មីៗនៅក្នុងវិស័យ fintech, ពាណិជ្ជកម្មអេឡិចត្រូនិច និងអនឡាញ (e-commerce) និង សេវាកម្មតាមតម្រូវការជាដើម។ មកទល់ពេលនេះ អាស៊ានមាន unicorn សរុបជាង ១០ ក្រុមហ៊ុន ដែលប្រទេសសិង្ហបុរី និងឥណ្ឌូនេស៊ីជាអ្នកនាំមុខ ក្នុងការបង្កើតអាជីវកម្ម unicorn នេះ ហើយក្នុងនោះក៏មានលេចមុខនូវក្រុមហ៊ុនមួយរបស់វៀតណាម ដែលឈ្មោះ VinaGame ផងដែរ។

 

ឥឡូវយើងនាំគ្នាមកស្វែងយល់ពីក្រុមហ៊ុននីមួយៗទៅមើលថាពួកគាត់ជាប្រតិបត្តិករក្នុងវិស័យអ្វីខ្លះ?

 

១. Grab: ឈ្មោះនេះប្រហែលជាត្រូវបានគេស្គាល់ច្រើន និងឧស្សាហ៍លឺជាងគេក្នុងចំណោមទិដ្ឋភាពបច្ចេកវិទ្យានៅអាស៊ាន។ ក្រុមហ៊ុននេះ ត្រូវបានចាប់ផ្តើមដោយស្ថាបនិកជនជាតិម៉ាឡេស៊ីនៅប្រទេសសិង្ហបុរីនៅឆ្នាំ ២០១២ ហើយវាគឺជាក្រុមហ៊ុន unicorn ដំបូងបង្អស់នៅអាស៊ាន ដែលត្រឹមខែកុម្ភៈឆ្នាំ ២០២០ ត្រូវបានគេវាយតម្លៃដល់ទៅ ១៤ ពាន់លានដុល្លារ។ សព្វថ្ងៃ វាផ្តល់សេវាកម្មកម្ម៉ង់យានជំនិះ, ដឹកជញ្ជូនម្ហូបអាហារ និង ការទូទាត់ដោយឥតប្រើសាច់ប្រាក់ជាដើម (cashless payment)។

 

២. Sea: គឺជាក្រុមហ៊ុន Internet platform របស់សិង្ហបុរីបង្កើតក្នុងឆ្នាំ ២០០៩ ដែលផ្តល់សេវាកម្មព័ត៌មានវិទ្យា និងឌីជីថល ដោយរួមបញ្ចូលនូវកម្មវិធីកំសាន្ត, e-commerce និង fintech។ ក្រុមហ៊ុននេះមាន Shopee ជាដៃផ្នែក e-commerce និង Seamoney ជាដៃផ្នែក fintech ដែលបច្ចុប្បន្នកំពុងតែរីកចម្រើនយ៉ាងឆាប់រហ័ស។ កាលពីឆ្នាំ ២០១៧ ក្រុមហ៊ុននេះបានប្រកាសដាក់លក់ភាគហ៊ុនរបស់ខ្លួនជាសាធារណៈ (IPO) នៅលើទីផ្សារភាគហ៊ុនរបស់អាមេរិក (NYSE) ហើយត្រឹមថ្ងៃទី ២ ខែវិចិ្ឆកា ឆ្នាំ ២០២០ ក្រុមហ៊ុននេះ មាន market capitalization សរុបចំនួន ៧៧ ពាន់លានដុល្លារ។

 

៣. Lazada: គឺជាក្រុមហ៊ុន e-commerce នៅប្រទេសសិង្ហបុរី ដែលត្រូវបានបង្កើតនៅឆ្នាំ ២០១២ ដោយ Rocket Internet របស់អាឡឺម៉ង់។ ក្រុមហ៊ុននេះ ត្រូវបានផ្ទេរសិទ្ធកាន់កាប់ទៅឱ្យក្រុមហ៊ុន Alibaba របស់លោកជេក ម៉ា នៅឆ្នាំ ២០១៦ ជាមួយនឹងការវិនិយោគក្នុងតម្លៃប្រមាណ ២ ពាន់លានដុល្លារ។

 

៤. Razer: ក្រុមហ៊ុននេះ មានទីស្នាក់ការកណ្តាលទាំងនៅសិង្ហបុរីនិងសហរដ្ឋអាមេរិក និងត្រូវបានបង្កើតឡើងក្នុងឆ្នាំ ១៩៩៨ ដែលមានអាយុចំណាស់ជាង unicorn ផ្សេងៗទៀតដែលត្រូវយកមកនិយាយក្នុងថ្ងៃនេះ ។ Razer ឌីស្សាញ, ផលិត និងលក់គ្រឿងអេឡិចត្រូនិក, gaming computer និង hardware ជាដើម។ នៅឆ្នាំ ២០១៧ ក្រុមហ៊ុននេះបាន IPO នៅលើទីផ្សារភាគហ៊ុនរបស់ហុងកុងផងដែរ (HKG) ហើយត្រឹមថ្ងៃទី ២ ខែវិចិ្ឆកា ឆ្នាំ ២០២០ ក្រុមហ៊ុននេះ មាន market capitalization សរុបប្រហែល ២០ ពាន់លានដុល្លារ។

 

៥. Gojek: ជាក្រុមហ៊ុនឥណ្ឌូនេស៊ី ដែលត្រូវបានបង្កើតឡើងនៅឆ្នាំ ២០០៩ និងជាដៃគូប្រកួតមួយរបស់ Grab។ Gojek ត្រូវបានប៉ាន់ស្មានដោយក្រុមហ៊ុនអាមេរិកថាមានតម្លៃប្រហែល ៩ ទៅ ១០ ពាន់លានដុល្លារ។

 

៦. Traveloka: ជាក្រុមហ៊ុនឥណ្ឌូនេស៊ី បង្កើតឡើងនៅឆ្នាំ ២០១២ ដែលផ្តល់នូវសេវាកម្មកក់សំបុត្រយន្តហោះនិងសេវាកម្មកក់សណ្ឋាគារតាមអ៊ីនធឺណែតដែលកំពុងរីកចម្រើននៅក្នុងអាស៊ីអាគ្នេយ៍និងអូស្ត្រាលី។ ត្រឹមខែកក្តដា ឆ្នាំ ២០២០ ក្រុមហ៊ុននេះ ត្រូវបានគេប៉ាន់ស្មានថាមានតម្លៃប្រហែល ៣,៣ ពាន់លានដុល្លារ។

 

៧. Tokopedia: ជាក្រុមហ៊ុនបច្ចេកវិទ្យារបស់ ឥណ្ឌូនេស៊ី បង្កើតឡើងនៅឆ្នាំ ២០០៩ ដែលមានឯកទេសខាងពាណិជ្ជកម្ម e-commerce។ ក្នុងឆ្នាំ ២០២០ នេះ ក្រុមហ៊ុន Tokopedia ទទួលបានការបណ្តាក់ទុនបន្ថែមចំនួន ១,៥ ពាន់លានដុល្លារ ដែលធ្វើឱ្យតម្លៃរបស់ក្រុមហ៊ុនកើនឡើងទៅប្រមាណ ៩ ពាន់លានដុល្លារ។

 

៨. Trax: ជាក្រុមហ៊ុនបច្ចេកវិទ្យារបស់សិង្ហបុរី បង្កើតឡើងនៅឆ្នាំ ២០១២ ដែលជួយយីហោធំៗធ្វើការស្រាវជ្រាវទីផ្សារនៅតាមស្ថានីយលក់រាយ (retails terminal)។ ក្រុមហ៊ុន Trax មានតម្លៃប្រហែល ១,៣ ពាន់លានដុល្លារតាមការប៉ាន់ស្មានតម្លៃចុងក្រោយនាឆ្នាំ ២០១៩។

 

៩. VinaGame (VNG): ជាក្រុមហ៊ុនហ្គេមរបស់វៀតណាមដែលបច្ចុប្បន្ន បង្កើតឡើងនៅឆ្នាំ ២០០៤ ហើយបច្ចុប្បន្នបានពង្រីកចូលក្នុងវិស័យ e-commerce, បណ្តាញទំនាក់ទំនងសង្គម, ការទូទាត់ប្រាក់ផ្នែកអេឡិចត្រូនិចជាដើម។ តាមកិច្ចព្រមព្រៀងចុងក្រោយរបស់ក្រុមហ៊ុនក្នុងឆ្នាំ ២០១៩ ក្រុមហ៊ុន VNG មានតម្លៃប្រមាណ ២,៧៧ ពាន់លានដុល្លារ។

 

១០. Bukalapak: ជាក្រុមហ៊ុនបច្ចេកវិទ្យារបស់ ឥណ្ឌូនេស៊ី បង្កើតឡើងនៅឆ្នាំ ២០១០ ហើយបច្ចុប្បន្ន វាជាក្រុមហ៊ុន e-commerce ធំជាងគេនៅឥណ្ឌូនេស៊ី។ ក្រុមហ៊ុន Bukalapak មានតម្លៃប្រហែល ២,៥ ពាន់លានដុល្លារតាមការប៉ាន់ស្មានតម្លៃចុងក្រោយនាឆ្នាំ ២០១៩។

 

១១. JD.ID គឺជាអនឡាញម៉លរបស់ឥណ្ឌូនេស៊ីបង្កើតឡើងនៅឆ្នាំ ២០១៥។ ក្នុងឆ្នាំ ២០២០ ក្រុមហ៊ុន JD.ID ត្រូវបានប៉ាន់ស្មានថាមានតម្លៃប្រហែល ១ ពាន់លានដុល្លារ

 

១២. OVO គឺជាសេវាកម្មទូទាត់ឌីជីថលរបស់ប្រទេសឥណ្ឌូនេស៊ី បង្កើតនៅឆ្នាំ ២០១៧ ដោយសម្ព័ន្ធ Lippo គ្រុប ដែលគ្រប់គ្រងទ្រព្យសម្បត្តិជាង ១៥ ពាន់លានដុល្លា រនិងមានវិនិយោគទុនយ៉ាងច្រើនក្នុងវិស័យលក់រាយ, ប្រព័ន្ធផ្សព្វផ្សាយ, អចលនទ្រព្យ, ធនាគារ, ធនធានធម្មជាតិ, សណ្ឋាគារ, និងសេវាកម្មថែទាំសុខភាព។ ត្រឹមខែតុលា ឆ្នាំ ២០១៩ ក្រុមហ៊ុន OVO ត្រូវបានប៉ាន់ស្មានថាមានតម្លៃប្រហែល ២,៩ ពាន់លានដុល្លារ។

 

ចាំមើលតិចមើលថាប៉ុន្មានឆ្នាំទៀតខ្មែរយើងអាចមាន unicorn នឹងគេដែរ?