LuyBook តែងនិយាយថា បើអាច គួរចាប់ផ្តើមវិនិយោគពីក្មេងទើបល្អ ព្រោះដូចសុភាសិតបុរាណខ្មែរដែលតែងពោលថាតក់ៗពេញបំពង់។ តែសម្រាប់បងប្អូនសិស្សនិស្សិត ឬជាអ្នកទើបបញ្ចប់ការសិក្សា និងទទួលបានការងារដំបូង អ្នកទាំងអស់គ្នាប្រហែលជាមិនទាន់មាន​កញ្ចប់វិនិយោគធំ មានលុយត្រឹម ១,០០០ ដុល្លា តើអាចយកទៅវិនិយោគលើអ្វីជាការល្អ?

មានផ្លូវមួយចំនួនដែលបងប្អូនទាំងអស់គ្នាអាចសាកល្បងស្វែងយល់បន្ថែមបាន!

តើអ្នកទាំងអស់គ្នាដឹងទេ ថាខ្មែរក៏មានផ្សារមូលបត្រដែរ។ បច្ចុប្បន្ននេះ មានក្រុមហ៊ុនសាធារណៈចំនួន ៧ ដែលកំពុងជួញដូរភាគហ៊ុនរបស់ខ្លួនក្នុងផ្សារមូលបត្រកម្ពុជា។ អ្នកទាំងអស់គ្នាអាចទិញភាគហ៊ុនទាំងនេះ ក្នុងតម្លៃមួយទាប ចាប់ពី ៣,៣០០ រៀលឡើងទៅ ក្នុងមួយហ៊ុនតែប៉ុណ្ណោះ ហើយក្រុមហ៊ុនភាគច្រើន ដូចជាកំពង់ផែស្វយ័តភ្នំពេញ (PPAP) និងរដ្ឋករទឹក(PWSA) មានគោលការណ៍ផ្តល់ភាគលាភថេរដល់វិនិយោគិនផងដែរ។

២. វិនិយោគទៅលើមូលនិធិ S&P 500 Index Fund

S&P 500 Index Fund គឺមូលនិធិជួញដូរលើទីផ្សារសាធារណៈ (mutual fund ឬ exchange traded fund) ដែលមានផលបត្ររៀបចំឡើង ដើម្បីធ្វើត្រាប់តាមសកម្មភាពរបស់ក្រុមហ៊ុនសាធារណៈធំជាងគេទាំង ៥០០ ដែលដាក់លក់លើទីផ្សារមូលបត្រអាមេរិក។ការបណ្តាក់ទុនលើ S&P 500 Index Fund អាចឲ្យវិនិយោគិនដែលមានដើមទុនទាប វិនិយោគលើក្រុមហ៊ុនទាំង ៥០០ នេះក្នុងពេលតែមួយ ដោយមិនចាំបាច់ខ្វល់ពីហានិភ័យដូចពេលដែលអ្នកវិនិយោគលើភាគហ៊ុនរបស់ក្រុមហ៊ុននីមួយៗ ដោយមូលហេតុថា Index Fund ទាំងនេះតាមដានសន្ទស្សន៍របស់ទីផ្សារយ៉ាងជាប់លាប់ និងមានពិពិធកម្មខ្ពស់ ហើយថ្វីត្បិតតែតម្លៃភាគហ៊ុននៃក្រុមហ៊ុនមួយក្នុងសន្ទស្សន៍នេះអាចប្រែប្រួល ក្នុងរយៈពេលខ្លី តែវានឹងនៅតែបន្តកើនឡើងជាបន្តបន្ទាប់ក្នុងរយៈពេលវែងដរាបណាសេដ្ឋកិច្ចមាន កំណើន ហើយវិនិយោគិនអាចទទួលបានផលចំណេញមកវិញជាមធ្យមប្រហែល ៧%​ ក្នុងមួយឆ្នាំ។ S&P 500 Index Fund​ មួយចំនួននៅលើទីផ្សារ មានដូចជា Vanguard S&P 500 ETF (VOO), iShares Core S&P 500 ETF (IVV) និង SPDR S&P 500 ETF Trust (SPY) ដែលអ្នកទាំងអស់គ្នាអាចទៅធ្វើការសិក្សាបន្ថែមពីកម្រៃជើងសាររបស់ Index Fund​ នីមួយៗបាន។

៣. វិនិយោគលើភាគហ៊ុនមួយចំនួនតូចដែលអ្នកជឿជាក់ថានឹងមានកំណើនល្អក្នុងរយេះពេលវែង​

ការវិនិយោគលើ Index Fund មានហានិភ័យទាបជាងការវិនិយោគភាគហ៊ុនរបស់ក្រុមហ៊ុនមួយ​ ចំនួនតូច​ ប៉ុន្តែកំណើនក៏អាចបានទាវជាងដែរ។ ប្រសិនជាអ្នកទាំងអស់គ្នាចង់ទទួលបានកំណើនមធ្យម ប្រចាំឆ្នាំលើសពី ៧%​ អ្នកទាំងអស់គ្នាអាចជ្រើសរើសភាគហ៊ុនរបស់ក្រុមហ៊ុន ៥​​ ទៅ ១០ ដែលអ្នកទុកចិត្តបំផុតថានឹងមានកំណើន ក្នុងរយះពេលវែង ហើយបែងចែកកញ្ចប់ប្រាក់ ១០០០ ដុល្លារនោះមកវិនិយោគក្នុងភាគហ៊ុនទាំងនោះ។​

ភាគហ៊ុននោះអាចជាប្រភេទ growth stocks ឬ dividend stocks​ អាស្រ័យលើវិធីសាស្រ្តរបស់ អ្នកទាំងអស់គ្នា និងកម្រិតហានិភ័យដែលអាចទទួលយកបាន។ Luybook នឹងនិយាយពីវិធីសាស្រ្តក្នុងការវិភាគ​និងជ្រើសរើសភាគហ៊ុន ក្នុងអត្ថបទក្រោយៗ។

ទោះបីក្រុមហ៊ុនជាច្រើនមានមានតម្លៃហ៊ុនថ្លៃៗ​ ដល់ខ្ទង់រយឬពាន់ដុល្លារក្នុងមួយហ៊ុន ក៏មិនជាបញ្ហា ព្រោះអ្នកទាំងអស់គ្នាអាចទិញជាចំណែកនៃភាគហ៊ុនបាន (Fractional Share)។​ ការវិនិយោគលើ Fractional Share គឺមិនខុសគ្នាពីភាគហ៊ុនធម្មតាទេ។ អ្នកទាំងអស់គ្នាគ្រាន់តែត្រូវស្វែងរក និងចុះឈ្មោះជាមួយ Broker ដែលមានផ្តល់សេវាកម្មនេះ ដែលមានដូចជា Interactive Broker ជាដើម។

៤. វិនិយោគទៅលើ មូលនិធិ REIT (Real Estates Investment Trust)

REIT គឺជាមូលនិធិសាធារណៈ ដែលកាន់កាប់កម្មសិទ្ធិ ឬ គ្រប់គ្រងអចលទ្រព្យដែលផ្តល់ជាលំហូរសាច់ប្រាក់ជាប្រចាំ ដូចជាអាគារការិយាល័យ ផ្សារ លំនៅដ្ឋាន សណ្ឋាគារ មន្ទីរពេទ្យ រោងចក្រជាដើម។ វិនិយោគិនអាចដាក់ទុនវិនិយោគលើវិស័យអចលនទ្រព្យបានតាមរយៈមូលនិធិនេះ ដោយមិនចាំបាច់ចំណាយដើមទុនធំទៅទិញអគារទាំងនោះ ហើយអាចទទូលបានអត្រាភាគលាភខ្ពស់ទៀតផង ព្រោះថាយ៉ាងហោច៩០%នៃចំណូលទទួលបានពីអចលទ្រព្យក្នុងមូលនិធិនេះត្រូវ​បង់ជាភាគលាភមកអ្នកវិនិយោគ។ ក្នុងឆ្នាំ ២០២១ នេះ Iron Mountain ដែលជាក្រុមហ៊ុន គ្រប់គ្រងមជ្ឈមណ្ឌលទិន្នន័យ ជិត ១,៥០០ ទីតាំងលើពិភពលោក ហើយក្នុងនោះ ៩៥% ជាទិន្នន័យរបស់ក្រុមហ៊ុនក្នុងបញ្ជី Fortune 1000 ឈរឈ្មោះជា REIT មួយក្នុងចំណោម REIT លំដាប់កំពូលលើពិភពលោក ដោយផ្តល់ភាគលាភដល់វិនិយោគិនរហូតដល់ទៅ ៨.៧%។ លើសពីនេះ ការវិនិយោគលើ REIT អាចជួយអ្នកក្នុងការ​ធ្វើពិពិធកម្មផលបត្ររបស់អ្នកផងដែរ ដោយងាកមកខាងវិស័យអចលនទ្រព្យតាមប្រភេទខុសៗគ្នា។ តែវិនិយោគិនក៏ត្រូវដឹងថាតម្លៃរបស់ REIT ងាយប្រែប្រួលទៅតាមការឡើងចុះនៃអត្រាការប្រាក់ ហើយហានិភ័យរបស់ REIT នីមួយៗគឺខុសគ្នាទៅតាមប្រភេទរបស់វា។

LuyBook សង្ឃឹមថាជម្រើសទាំងអស់នេះ អាចអាចផ្តល់ជាគំនិតខ្លះៗដល់អ្នកដែលទើ​បចាប់ផ្តើម វិនិយោគថ្មីថ្មោង ពិសេសអ្នកដែលមានដើមទុនទាប ហើយមិនដឹងថាគួរធ្វើអីជាមួយលុយរបស់ខ្លួន ក្នុងការ​​ចាប់ផ្តើមវិនិយោគចាប់ពីថ្ងៃនេះទៅ។